على كثر الخطاوي اللي مشاها خاطري الحساس
اشوفك يالغلا للحين ما تدرين باحساسي
وعلى كل الغناوي اللي يرددها جميع الناس
اشوفك عايش بحالك وكنّك يالغلا ناسي
منو يقدر يعيش وما يبي في روحه الانفاس
ومنو غيرك حبيبي كان يروي شوق انفاسي
هذاك اللي مضى اوّل وانا في دنيتك عساس
ولو حتى مضى عمري وغزاني الشيب في راسي
كذا طبعك تدور وين با تلقى بريق الماس
وتنسى من عطاك الروح لاجلك وانت يالقاسي
صحيح انه يسموّنك على عرش الغلا دوّاس
وانا غلطة زماني اني عطيتك ارضي وفاسي
وقلت ازرع من الازهار وكل الكون له حراس
اشوفك ترمي امالي وتزرع للعنا ياسي
حسافه ما توهقتك حبيبي تجهل الاحساس
ولا ظنيت في لحظة فؤادك يالغلا قاسي